2023/24 港超聯即將開鑼！賽馬會開聲體好高興同大家宣布，將會同深水埗體育會足球隊結成社區合作夥伴。 

8月16日，深水埗體育會足球隊總監高俊基(高sir) 同副隊長梁星耀特登嚟到協進會觀塘會址，响賽馬會開聲體顧問李德能嘅見證之下，同我地會長黃俊恒（Billy) 及副會長陳志剛 (Alex) 交換波衫，象徵雙方嘅合作正式開始。

今季開始，賽馬會開聲體將會為10場深水埗嘅港超聯主場賽事提供體育口述影像服務，只要去到賽馬會開聲體嘅youtube channel 同網台就可以聽到。留意，如果場波本身係東網同港台32直播嘅場次，無論係收費定免費，我地會於完場後一個半小時上傳整場賽事嘅聲音描述，而其他非收費直播場次，就會實時作聲音直播。各位視障球迷或者其他對體育口述影像感興趣嘅公眾，就可以成季緊貼住深水埗嘅比賽喇！當然有部分場次我地會組織視障朋友實體入場，親身支持深水埗啦！ 

會長Billy 話希望今次嘅合作，唔單止可以令更多人了解到體育口述影像係咩一回事，同時都希望讓更多公眾朋友，特別係深水埗嘅街坊，可以多一個渠道留意到球隊嘅動向，鼓勵到大家更加關注深水埗體育會足球隊，以及係港超聯同香港足球嘅發展。

深水埗高Sir 就話感謝協進會邀請，透過賽馬會開聲體活動，令本地足球推廣至唔同階層，增加大家對本地足球瞭解。亦令到更多唔同受眾了解到深水埗體育會足球隊同埋佢地嘅工作，讓佢地未來可以走入社區，做更多社區服務。

深水埗係一個多元又充滿活力嘅社區，所以雙方都好希望响足球以外，可以攜手合作走入社區，以不同形式為深水埗街坊服務，回饋社區。我地已經諗左好多「橋」，等球季開鑼後，就會陸續開展，歡迎大家到時支持我地嘅地區工作。 

以後我地就响深水埗運動場多啲見面！一齊為深水埗體育會足球隊打打氣！

———————————

鼓勵大家以不同形式關注本地足球嘅發展，最直接嘅支持當然係買飛入場！或者收睇東網我撐本地波嘅賽事影像直播，免費嘅場次東網同港台電視32會有得睇，按次收費直播就要去返我撐本地波嘅專頁度留意有關詳情，而其他比賽佢地都會提供文字直播，唔好再話冇途徑了解港超聯啦！

———————————